ایک سلسلہ گفتگو میں فرمایا کہ پہلے میرے خطوط میں بڑے بڑے مضامین ہوتے تھے اس زمانہ میں ایک صاحب کا خط آیا تھا اس میں اسی ( 80 ) سوالات تھے میں نے سب کا جواب لکھا مگر اب تجربہ سے معلوم ہوا کہ رعایت کرنے سے لوگ حدود میں نہیں رہتے اس لیے اب طرز بدل دیا آج ہی ایک صاحب کا خط آیا اس میں سات سوالات ہیں اور اس پر یہ لکھا ہے کہ یہ امراض کا بیان تو اجمالی ہے میں نے جواب میں لکھا ہے کہ امراض کا بیان تو اجمالی ہو سکتا ہے مگر علاج کا بیان اجمالی نہیں ہو سکتا اور تفصیلی کا وقت نہیں لہذا ایک لفافہ میں ایک ہی مرض کا ظاہر کر کے علاج پوچھا جائے ۔
